JOLAS enpresak % 100 birziklatuak eta birziklagarriak diren plastikozko haur-parkeak, gimnastika-zirkuituak, zirkuitu bioosasungarriak eta hiri-altzariak diseinatzen, fabrikatzen eta instalatzen ditu. Hiriko plastikozko ontzien hondakinak balorizatzen ditu, eta lehengai gisa sartzen ditu bere proiektu berritzaileetan. Horrela, ekonomia zirkularraren zikloa osatzen da.

Enpresaren aurkezpen laburra (jarduera, kokapena...):

JOLAS haur-parkeetako produktuen marka komertziala da, Zarauzko ELECTRO TALLERES ZARAUZ S.A. enpresan fabrikatzen direnena. Oso marka ezaguna da, eta 40 urte baino gehiagoan haur, gazte eta helduentzako aisialdi-ingurune dibertigarri eta osasungarriak eskaini ditu.

Nola eta noiz sortu zen proiektua? Zerk bultzatu zintuzten zuen jarduera ekonomia zirkularrerantz orientatzera?

2017an ezagutu genuen proiektu honetan gure bazkide bikaina izan dena: Hahn Kunstoffe; eta argi ikusi genuen. Gizarte-erantzukizuna dela-eta birziklatutako materialean oinarritutako konponbideak garatzera pasatu ginen, gure posiziotik, gure ingurunea hobeto zaintzen laguntzeko. Aldi berean, gure plan estrategikoan adierazten dugu garrantzitsua zela bide horri jarraitzea, nahiz eta azken bi urteetan proiektuak abiadura handiagoa hartu. Ildo horrek, gainera, aukera ematen digu marka asko eta egiaztatuak eduki arte eboluzionatutako sektore batetik bereizteko. Gaur egun, ekonomia zirkularra da JOLASen DNAren definizioaren lehen nortasun-ikurra.

Zein motatako produktuak egiten dituzue erabiltzen duzuen lehengaitik abiatuta?

% 100 birziklatutako plastikozko profilak erabiltzen ditugu gure haur-parkeak eta hiri-altzariak fabrikatzeko. Berrerabiltze sortzailearekin (upcycling), plastiko-hondakinak produktu-ziurtagiridun zabu, zabu-aulki eta tobogan-egitura bihurtzen ditugu.

Zein da zuen erakundearen balioa ekonomia zirkularreko proiektu gisa? Eta zein da zuen erakundearen ingurumen- eta gizarte-balioa?

Lehen aipatu dudan bezala, Jolasen DNAren definizioarekin, enpresa-kultura guztiz identifikatuta dago ekonomia zirkularrarekin, eta esan dezakegu dagoeneko 432.000 kg plastiko-hondakin instalatu ditugula gaur arte. Zabortegietan, erraustegietan edo naturan bukatu ordez balorizatu diren hondakinak. Ez da abantaila bakarra, bere bizi-zikloaren amaieran berriro fabrikazio-zikloan sar daitekeen lehengai bat erabiltzen baitugu, birziklatuz eta berrerabiliz.

Argi daukagu JOLASen etorkizuna erabat lotuta dagoela ekonomia zirkularrarekin, baina esan dezakegu gaur egun ere posizio nagusi bat duela. Plastikoaren ekonomia zirkularra sustatzen jarraitzen dugu.

JOLAS 35 langileko erakundea da, gehienak Euskal Herrikoak, eta tokiko ingurunean aberastasun ekonomikoa eta gizarte-ongizatea sortzen ditu, euskal industria-sareko enpresen artean lankidetzan. Aldi berean, estatu mailako hiri-ingurunean ere inpaktua dugu, baita Frantzian eta Portugalen ere.

Zein garrantzi du I+G+b-k zuen erakundean?

Garrantzi izugarria. Hartu dugun bideak gure hornidura-iturriak, ekodiseinu alternatiboak eta abar etengabe eguneratzea eskatzen digu. Azken finean, adimen lehiakorra eta, batez ere, zaintza teknologikoa funtsezkoak dira etengabe berritu ahal izateko. Gai izan behar dugu hori guztia gure produktura eramateko, hobetzeko eta indarrean dauden araudien arabera ziurtatzeko, betiere jasangarritasun- eta zirkulartasun-irizpideak errespetatuz. Oraingoz, nota onarekin betetzen ari gara zeregin hori.

Zein izan dira urte hauetako zuen lorpen nagusiak?

Aitzindariak gara sektorean % 100 birziklatutako plastikozko profil birziklagarriak erabiliz, UNE EN 14006:2020 Ekodiseinuaren ziurtagiriarekin eta UNE EN 1176-1:2018 arauaren arabera ziurtatutako produktuekin. 4 urteren ondoren, proiektua kontsolidatuta dago. Horren erakusgarri da dagoeneko lizitazio publikoak irabazten ari garela plastiko birziklatuko parkeen eskaintzekin. Erakunde publikoak eta erakunde pribatuak bat egiten ari dira gure ingurunea zaintzeko bidearekin.

Hori da, besterik gabe, lorpen nagusia. Era berean, modu aktiboan laguntzen ari gara erabiltzen dugun lehengaiarekin irekitzen diren aukera guztiak zabaltzen, lortutako produktua JOLASen edo beste nonbait fabrikatzen den kontuan izan gabe. Gure egitekoa beste batzuek bide berean urratsak egin ahal izan ditzaten laguntzea dela uste dugu.

Zer uste duzue behar dela ekonomia zirkularra oro har sendotu dadin, eta, bereziki, Gipuzkoan?

Uste dut beharrezkoa dela zirkularrak ez diren jarduerak zigortzea eta jarduera jasangarriak lehenestea. Adibidez, isurketa-tasak eta errausketa-tasak handitzea izan daiteke.

Ekonomia zirkularra sendotzeko, lizitazio publikoek eskainitako proiektuen jasangarritasun- eta zirkulartasun-ezaugarriak baloratu behar dituzte beren pleguetan. Gure konponbideak edo helburu bera duten beste batzuk zabaltzea funtsezkoa da sektore pribatuak gertutik ezagutu ditzan eta material tradizionalen aldean dituzten ezaugarriak ikus ditzan. Errealitate bat da, eta konpromiso bat da horretan laguntzea.

Etorkizunean ez dut zirkularra ez den ekonomiarik ulertzen. Egunean jartzea edo atzean eta zaharkituta geratzea da kontua. Beraz, uste dut beharrezkoa dela enpresek eta gizarteak ohiturak jasangarritasunerantz aldatzea.