Saltokiaren aurkezpen laburra (jarduera, kokapena...):

TERNUA Groupen 200 pertsona baino gehiagoko taldea gara, eta pasioz eta gogo biziz aritzen gara outdoorraren eta hiriko modaren segmentuetan ehungintza eta ekipamendu teknikoa diseinatzen, fabrikatzen eta merkaturatzen. Ternua, Loreak Mendian, Astore, Lorpen eta Ternua Workwear markek osatzen dute taldea, eta gure produktuek sormena eta funtzionaltasuna uztartzen dituzte, jasangarritasunaren aldeko konpromiso sakonarekin.

Ternua Group osatzen dugun taldearen jarrera funtsezko lau balio korporatibotan oinarrituta dago: originaltasuna, konpromisoa, berrikuntza eta anbizioa. Jarrera horretan, non nola zer baino gehiago axola, planeta ez da aukera bat, lehentasuna da. Eta konpainian "Change priorities" leloarekin identifikatzen dugu.

Nola eta noiz jaio zen proiektua?

TernuaGroupen hazia 1986an sortu zen, gaur egun proiektuaren garapenean lanean jarraitzen duten Uribesalgo anaiek Arrasate Kirolak kirol denda sortzea erabaki zutenean.

1988an, ASTORE sortzea erabaki genuen, kirolari lotutako gure lehen kirol-marka. 1994an, naturarekiko eta mendiarekiko dugun grinari erantzuteko asmoz, TERNUA marka sortu genuen, hasieratik iraunkortasunarekiko konpromiso handia duena.

Ternuaren sorkuntzarekin lau balea adoptatu genituen WDCren bidez eta lehen aldiz TERNUArekin hornitu genituen gure lagun Alberto eta Felix Iñurrategi, eta haiekin batera 14 zortzimilakoak estilo alpinoan eta oxigeno lagundurik gabe eskalatzeko abenturan parte hartzea adostu genuen. Horrek eta geroko babesletzek ezagutza handia ematen digute produktu teknikoak garatzeko orduan.

2015ean, LORPEN taldearekin bat egin zuen, Etxalarko galtzerdi eta osagarrien markarekin. Navaran fabrikatzen zen, Pirinioen magalean.

Azkenik, 2019an, Donostiako Loreak Mendian modako marka txertatzen da. Azken sartze horrekin, Talde dibertsifikatua sortzea lortu genuen. Euskal Autonomia Erkidegoko markek osatzen dute talde hori, iraunkortasunaren aldeko konpromisoari lotuta eta mundu osoan beren balioak jantzien bidez zabaltzeko anbizio handiarekin.

Zer lotura dago zuen proiektuaren eta ekonomia zirkularraren artean? Zeintzuk dira zuen ekintza nagusiak eta azken urteotako aurrerapen eta lorpen nagusiak, iraunkortasunari dagokionez?

Ingurunean eta kliman dugun eragina murrizteko konpromisoa eta asmoa hasieratik sortu da. Nahiz eta askotan ahalegin eta konpromiso handia eskatzen duen, eta korrontearen aurka arraun egitea ere bai, hasieratik erabaki genuen urrats garrantzitsuak ematea. 2006an kotoi organikoa erabiltzen hasi ginen, 2013an gure luma guztia birziklatua da eta 2016an gure produktuen % 80an PFCak ezabatu genituen (gaur egun produktuen % 100ean ezabatuta daukagu).

Mugarri horiez gain, 2015ean "Proiektu Bereziak" deitzen ditugun ekonomia zirkularreko proiektuetan hasi ginen lanean. Proiektu horietan, gure inguruan sortzen diren hondakinak produktuak egiteko lehengai bihurtzen ditugu.

Proiektu horien barruan, ardi-artilea gure jantzientzako isolatzaile termiko jasangarri bihurtu dugu; sagardotegietako intxaur-zorroak bildu ditugu jantzietan tindu natural gisa aplikatzeko; Bermeo, Getaria eta Hondarribiko kofradiekin bildutako arrantza-sareak poliamida bihurtu ditugu jantzi teknikoak egiteko; edo garbitegietako ehun-hondakinak aprobetxatu ditugu gure jantziak egiteko hari oso erresistente eta jasangarri bat sortzeko.

Bestalde, lanean ari gara gure eragina neurtzeko eta produktuaz haratago murrizteko ekintzak egiteko. Adibidez, gure instalazioetan erabiltzen dugun energia jatorri jasangarrikoa da, itsasotik airerako garraioa lehenesten dugu edo hornitzaile guztiek produktuen jatorri iraunkorra bermatzen duten ziurtagiriak betetzen dituztela ziurtatzen dugu.

Amaitzeko, lanean ari gara gure bilduma guztiak birziklatuak, birziklagarriak edo biodegradagarriak izan daitezen, eta jantzi monomaterialak diseinatzen ari gara, haien birziklatze-prozesua errazagoa izan dadin eta, horrela, ekonomia zirkularraren zirkulua itxi ahal izateko.

Zer onura dakarzkizue ekonomia zirkularreko edo iraunkortasuneko ekintza horiek zuen merkataritzan aplikatzeak?

Ekonomia zirkularreko edo sestenibilitateko ekintzak garatuz, onuradun nagusia planeta da. Jasangarritasunera bideratutako pentsamoldea ezartzeak eraginkorragoak izaten laguntzen digu.

Zeintzuk dira zuen merkataritzan jasangarritasun-ekintzak aplikatzeko orduan aurkitzen dituzuen oztopoak edo zailtasunak?

Erronka nagusia karbonoaren neutraltasunerantz aurrera egitea da, gure inpaktua ahalik eta txikiena izan dadin. Horretarako, hornitzaileekin elkarlanean ari gara uraren eta energiaren kontsumoa murrizteko, fabrikazio-prozesuak eraginkorragoak egiteko eta produktu iraunkorragoak garatzeko.

Gainera, beste eragile batzuekin lanean ari gara, produktuen jatorria eta inpaktua trazagarri nola egin zehazteko irtenbideak garatzeko.

Zuen ustez, nola inplikatu ditzakegu Gipuzkoako saltoki gehiago beren egozioan iraunkortasuna integratzeko orduan?

Uste dugu saltokiak inplikatzeko modu eraginkor bat dela produktu jasangarriak saltzera bultzatzea.

Zer aholku edo gomendio emango zenizkieke praktika iraunkorrak aplikatu nahi dituzten Gipuzkoako beste saltoki batzuei?

Komeni da ekintza errazak egiten hastea, eta denen eskura egotea. Birziklatzea, argiak edo energia-hornitzailea aldatzea, birziklatutako altzariak erabiltzea. Urrats horiek eman ondoren, balio horiekin lerrokatuta dauden eta iraunkorragoak izateko konpromiso irmoa duten hornitzaileekin lan egitea gomendatuko genuke.