Otsailaren 11n, ostiralean, Naturklimako lehendakari eta Ingurumeneko eta Obra Hidraulikoetako diputatu José Ignacio Asensiok, David Zabala Fundazioko zuzendariarekin eta Nerea González Impact Hub-eko Ekonomia Zirkularreko arduradunarekin batera, “Zirkular Mentoring”-en I. edizioa aurkeztu zuten.

Programaren helburua da gazte ekintzaileak prestatzea eta Gipuzkoan ekonomia berdeko eta zirkularreko enpresa-proiektu berriak bultzatzen laguntzea. Zazpi start ups aukeratu dira lehen edizio honetan parte hartzeko. Horien helburua da hainbat alderditan behar diren tresnak, bitartekoak eta estrategiak eskaintzea, beren proiektu ekintzaileak merkatuan finkatzeko.

Trebakuntza 7 modulutan egingo da, eta horietako bakoitza arloko aditu batek emango du: berrikuntza zirkularra, prototipatze azkar zirkularra, inpaktu-neurketa eta KPIak, merkatua eta finantzak, marketina eta branding-a, pitching-a eta storytelling-a eta lege- eta inbertsio-alderdiak. Prestakuntza programa garatuko den lau hilabeteetan, parte-hartzaileek beren proiektu ekintzaileak bizkortzeko gaitasunak eskuratuko dituzte.

Lehen edizio honetan parte hartzeko aukeratu diren zazpi enpresak hauek dira: Algaloop, Newaste, Kafea, Scrap Ad, Ekomodo, Bask, Irrisarri. Naturklimako zuzendari David Zabalak nabarmendu duenez, “proiektuak sendotzeko maila desberdinetan dauden enpresak dira, batzuk barne-ekintzailetzatik datoz eta beste batzuk gazte ekintzaileek sustatutako proiektu berritzaileen ondorio dira”. Naturklimaren zuzendariak azpimarratu du hiru enpresa Naturklimak urtero sustatzen duen “Enpresa-erronkak” programatik datozela, ekonomia zirkularraren sektorean ekimena bultzatzeko asmoz.