Gipuzkoako borondatezko karbono-funtsa
Zer da Gipuzkoako borondatezko karbono funtsa?
Gipuzkoak klima-aldaketaren aurkako estrategia du, Klima Aldaketaren Aurkako Borroka Estrategia – Gipuzkoa Klima 2050 onesten duen maiatzaren 29ko 18/2018 Foru Dekretuaren bidez. Estrategia horren helburuen artean dago 2050ean klima-neutraltasuna bermatzea eta ekonomiaren deskarbonizazioa lortzea. Horretarako, urte horretarako gure berotegi-efektuko gasen isuriak % 90 murriztu behar ditugu 2005. urtearekin alderatuta.
Hala ere, zaila da isuri nuluetara iristea. Horregatik, gainerako % 10a karbono-hustulekuen bidez konpentsatu beharko da. Beraz, beharrezkoa da arintzen lagunduko duten mekanismoak eta tresnak diseinatzea, CO2 xurgatzeko Gipuzkoaren gaitasuna handituko dela bermatzeko.
Gipuzkoako borondatezko karbono-funtsa berotegi-efektuko gasen isuriak murrizteko eta konpentsatzeko borondatezko tresna gisa sortu da.
Nori zuzenduta dago?
Gipuzkoako borondatezko karbono-funtsean borondatezko erregimenean sartu nahi duten jardueren jabe diren pertsona fisiko edo juridiko guztiak. Beraz, izena eman dezakete enpresek, langile autonomoek, gobernuz kanpoko erakundeek, administrazioek, fundazioek, etab.
Gipuzkoan jarduten duten erakundeek izena eman ahal izango dute.
Nola aurkeztu behar dut nire eskaera?
Eskaerak Gipuzkoako Klima Aldaketaren Fundaziora, Naturklimara, bidaliko dira.
Zein da BEG kredituaren prezioa?
Konpentsatu beharreko CO2 tonaren prezioa 10,5 eurokoa da.
Zertarako erabiliko dira funtsak?
Jasotako dohaintzak Naturklimak kudeatuko ditu, Ingurumen Zuzendaritza Nagusiaren pean, eta lurraldean bertan konpentsazio-proiektuak sustatzera eta exekutatzera bideratuko dira, hala nola azpiegitura berdeak edo CO2 hustulekuak hobetzea, lurraldean energia berriztagarriak hobetzea, ekonomiaren deskarbonizazioa edo ekonomia zirkularra.
Zein onura lor ditzaket?
Karbono-aztarna kalkulatzea eta konpentsatzea helburu bikoitzeko tresna da.
Erakunde baten karbono-aztarna kalkulatzeak aukera ematen du berotegi-efektuko gasen isuriak ezagutzeko eta horiek murrizten laguntzeko; konpentsazioak, berriz, CO2 atmosferan murrizten laguntzeko aukera emango du, klima-aldaketaren aurkako borrokan lagunduz.
Beraz, bere karbono-aztarna kalkulatzen eta konpentsatzen duen erakundeak, lehen zehaztutakoari laguntzeaz gain, abantaila hauek ditu:
- BEG isuriak murrizteko aukerak identifikatzea.
- Gipuzkoako borondatezko karbono-funtsean sartzea.
- Erakundearen irudi korporatiboa eta posizionamendua hobetzea, klima-aldaketaren aurkako borrokan isuriak murrizteko eta konpentsatzeko borondatezko ekintzak egiteak aitorpena dakarrelako.
- Gipuzkoako borondatezko karbono-funtsaren bidezko isurien konpentsazioak dohaintza moduan eginez gero, Irabazi asmorik gabeko entitateen zerga erregimenari eta mezenasgoaren aldeko zerga pizgarriei buruzko apirilaren 7ko 3/2004 Foru Arauan aurreikusitako zerga-pizgarriak eskuratu ahal izango dira; izan ere, horren arabera, Fundazioari egindako dohaintzak eta ekarpenak partida kengarritzat hartuko dira sozietateen gaineko zergaren zerga-oinarria zehazteko.
Erantsi beharreko dokumentazioa
- Interesa adierazten duen eskaera.
Izena emateko inprimaki betea. Inprimakia eskuratu - Karbono-aztarna kalkulatzeko proiektua.
Karbono-aztarnaren gutxieneko baldintzak
- Karbono-aztarnaren mota: karbono-aztarnaren mota erakundeari edo produktuari dagokiona da.
- Irismenak: gutxienez 1. eta 2. irismeneko erakundearen karbono-aztarna inskribatu beharko da.
Funtsean inskribatzeko, 1. eta 2. irismenak bakarrik dira nahitaezkoak. 3. irismena ez da nahitaezkoa. Hala ere, kalkuluetan 3. irismena sartzea gomendatzen da; izan ere, kasu askotan, irismen horretan sartutako isuriak erakunde baten isuri guztien gehiengoa dira. - Denbora-muga: aztarna kalkulatuko da urte natural bat barne hartzen duen ondoz ondoko 12 hilabeteko aldirako.
- Kanpo-egiaztapena: Gipuzkoako CO2ren borondatezko karbono-funtsaren esparruan, aztarna inskribatu ahal izango da erakunde akreditatu batek egiaztapena lortu beharrik gabe.
Prozedura
Borondatezko Karbono Funtsean inskribatzeak erakunde batek urte zehatz baterako karbono-aztarna erregistratzea eta konpentsatzea dakar.
Karbono-aztarna gida honetan jasotako irizpideak kontuan hartuta aurkeztu ondoren, Gipuzkoako Klima Aldaketaren Fundazioak konpentsatu beharreko CO2 tonen monetizazioa kalkulatuko du, eta proposamena bidaliko zaio erakundeari, onar dezan.
Behin proposamena onartu eta dohaintza egindakoan, funts honetan inskribatu izanaren ziurtagiria egingo da. Jasota utziko da erakundeak adierazitako urtean bere karbono-aztarna kalkulatu eta konpentsatu duela.
