Naturklimak ekonomia zirkularra sustatuz klima-aldaketaren aurka borrokatzeko Enpresa Erronken edizio berri bati eman dio hasiera, Gipuzkoan hainbat hondakin eta baliabide aukera ekonomiko, ingurumeneko eta sozial berrietan eraldatzeko irtenbide berritzaileak proposatzen dituzten hiru proiektu abian jarriz. 2026ko edizioan hautatutako ekimenak honako hauek dira: Kudebattek sustatutako Berrizbatt; Mazedonia Design Studioren StandBira; eta SUTARGIk sustatutako AgroUrola. Hiru proposamenek garapen- eta balidazio-etapa berri bati ekingo diote orain, hasierako ideiatik eta lehenengo saiakuntzetatik lurraldean benetako aplikazioa izan dezaketen ereduetara aurrera egiteko.

Berrizbatt: erreminta-baterientzako bigarren bizitza

Berrizbatt, Kudebatt Gipuzkoako enpresaren ekimena, haririk gabeko erreminten bateriak berreskuratu eta birkondizionatzeko proposamena da. Bateria horiek lehenengo bizitza erabilgarria amaitu ondoren, berriro merkatuan sartzea du helburu, jatorrizko erabilera bera mantenduz.

Proiektuaren abiapuntua da bateria horietako askok oraindik ere erabilgarri izateko gaitasun handia mantentzen dutela baztertzen direnean. Proposamenak bilketa-, diagnostiko-, sailkapen- eta birkondizionamendu-sistema bat ezartzea aurreikusten du, egoera egokian dauden unitateak hautatzeko, degradatutako gelaxkak ordezkatzeko eta errendimendu egiaztatua eta bermea duten bateriak berriro merkaturatzeko. Materialak zuzenean birziklatzearen aurrean, Berrizbattek produktuen bizitza erabilgarria luzatu nahi du behin betiko birziklatu aurretik, haien fabrikazioan erabilitako baliabideen balioa ahalik eta gehien mantenduz.

StandBira: ekodiseinua eta material birziklatuak ekitaldiak eraldatzeko

Hautatutako bigarren proiektua, StandBira, Mazedonia Design Studiok sustatzen du, eta azoketan nahiz kultura-, kirol- eta enpresa-ekitaldietan ohikoa den arazo bati heltzen dio: oso denbora laburrerako diseinatutako egitura eta erakusketa-elementuen erabilerari. Elementu horiek, askotan, erabilera bakarraren ondoren hondakin bihurtzen dira.

StandBirak stand eta altzari interaktibo, berrerabilgarri eta ekodiseinatuen katalogo bat sortzea proposatzen du. Altzariak lehentasunez material birziklatuekin fabrikatuko dira, eta etorkizuneko ekitaldietan desmuntatu, konpondu eta berriz erabiltzeko diseinatuko dira. Ekimenak hurbileko materialak eta hornitzaileak lehenetsiko ditu, besteak beste, plastiko birziklatua, egurra, desmuntagarriak diren metalezko egiturak eta berrerabilitako ehunak. Lehenengo etapa honetan diseinuak, prototipoak eta katalogo fisiko eta digitala garatuko dira, eta, aldi berean, merkataritza-estrategia eta enpresa, erakunde eta tokiko eragileekiko lankidetza aktibatuko dira.

AgroUrola: nekazaritzako hondakinak material berri bihurtzea

SUTARGIk sustatutako AgroUrola proiektuak Urola Kostako nekazaritza-sektoreak sortutako hondakinetan jartzen du arreta. Proiektua eskualdean urtean nekazaritzako 500 tona plastiko-hondakin inguru sortzen direla kalkulatzen duen diagnostiko batetik abiatzen da. Horien artean filmak, olanak, hodiak, sareak eta gaur egun hurbileko zirkuituen bidez balorizatzeko zailtasunak dituzten beste material batzuk daude.

Proposamenaren helburua hondakin horiek taula, egitura-profil, pieza eta bestelako material birziklatu bihurtzeko lurralde-mailako sistema bat garatzea da. Era berean, material konposatu berriak garatzeko Latxa ardiaren artilea edo mahats-patsa bezalako frakzio organikoak gehitzeko aukera aztertuko da. Eraldaketa estrusio-, prentsaketa- eta injekzio-prozesu industrial desberdinen bidez egitea planteatzen da, hurbileko eredu batean oinarrituta, bilketa, tratamendua eta sortutako balio ekonomikoa lurraldean bertan mantentzeko.

Gipuzkoan eragina duen enpresa-berrikuntza

Hiru proiektu hauek abian jartzearekin batera, 2026ko Enpresa Erronkek berriro ere ekonomia zirkularraren printzipioak lurraldeko arazo zehatzetan aplikatzeko gai diren ekimenetan jartzen dute arreta: produktuen bizitza erabilgarria luzatzea, hondakinen sorrera murriztea, materialak berreskuratzea, ekodiseinua sustatzea eta hurbileko balio-kate berriak garatzea.

Datozen hilabeteetan, Berrizbatt, StandBira eta AgroUrola beren proposamenak garatzen eta baliozkotzen arituko dira, jarduera ekonomiko berri gisa sendotzeko potentziala duten irtenbideetara aurrera eginez eta Gipuzkoa zirkularrago, berritzaileago eta karbono-isuri txikiagokoa izaten lagunduz.